1Cor 11 | PWG | STEP | Ma vaghina, ikikava taku Bada ina bera akivikivini, nakanani tami bade aku bera kokivini.

a 11:11Kor 4:16; Plp 3:17

c 11:7Gen 1:26-27

d 11:8-9Gen 2:18-23

e 11:25Exod 24:6-8; Jer 31:31-34

1 Corinthians 11

1 Ma vaghina, ikikava taku Bada ina bera akivikivini, nakanani tami bade aku bera kokivini. ^a

Vokavakavara ina keta maninina.

2 Bera ku kudubina kamonai konotanotiku ma bade vibeyebeyena ikikava avi damani kurimi na kovovotani, tuna kubiine aigheghena kirakiiyemi. 3 Wekarakava akayokayowei da konakovi da Keriso ina Bada na God. Ma tomotomowa kudubita ita Bada na Keriso. Ma wavine ina bada na kawana. 4 Tomowa debiiyai eniponipowana bo ini peroveta da sisiya God gwabinai ina viiya ma ini debei ma gayamina kwarekwarewina na Keriso ekiikiiviberoi. ^{▼▼11:4Pol ina mariyai Keresiyana i kiki da tomowa nipowana bo sisiya God gwabinai ini debei na ke gayamina ina kwarewi. Nakanani ina berai na ini matakira da God ivokaravei. Ma bade i kiki da wavine maranai nipowana bo sisiya God gwabinai ini debei na gayamina ina kwarewi. I mariyai wivine gayamisi kwarekwarewisi imatakira da kakawasi i rewapana gaburinai imakamakai. Ma nani maranai wivine madamadawarisi gayamisi ke ita kwarekwarewa.} 5 Ma wavine debiiyai eniponipowana bo ini peroveta da sisiya God gwabinai ina viiya ma ini debei ma gayamina ke kwarekwarewina na kawana ekiikiiviberoi. Itinimaya, iyamna tuna nakanani ma uyawina ita gharitawei. 6 Ma wavine gayamina ke ita kwarewi na ibiibai da peyarina ita gharitawei. Ma kegha, itinimaya da uyawina ita boriya bo ita gharini. Tuna kubiine gayamina na ina kwarewi. 7 Ma tomowa gayamina na ke ina kwarewi, iyamna tuna God iyamoni da maghimaghighina ma kana kadara kamonai. Ma wavine tuna kawana kana kadara kamonai, ^c 8 iyamna dobu karenai tomowa tuwirina ivotawei da wavine iyamoni. Ma ke wavine tuwirina ita votawei da tomowa ita yamoni. ^d 9 Ma tomowa ke ita yamoni wavine kubiine, kegha, wavine iyamoni na tomowa kubiine. 10 Ma aneya notasiyai kubiine, wavine gayamina ina kwarewi, ini matakira da kawana ina rewapana gaburinai. 11 Ma tota Bada ina wawaya, tuna kubiine kamotiyai tomowa wavine ke ina kitaoruwei bo wavine tomowa ke ina kitaoruwei. Ivi ruwa na sago, 12 iyamna tomowa tuwirina ivotawei da wavine iyamoni ma bade wivine ituwa da tomotomowa. Ma bera kudubina God gwabinai ipisi.

13 Tami mani kotakovi da wavine gayamina ke kwarekwarewina ma God kurina ina nipowana na ibero. 14 Ma bera ku maninina evonavona da ke meyani tomowa ini uyawa da wavine nakanani. Nakanani ita berai na itinimaya kirakai. 15 Ma wavine ini uyawa na tuna na kana karawata. God uyawina iverei da gayamina kana terepapara. 16 Iyai ina kayowana da dughu kamonai vokavara kana keta ina viviruwa nonowei na kurimi aku sisiya damona na weni. Ke sago keta kana viruwa ita makamakai da aviyavisina wekarakava avi sisiyei na tuna kava. Ma tokai ma God ina wawaya ekalesiya bogii ma bogiiyai na kudubita tuna takivikivini.

Korint damsi Bada ina kamporagha ikamkam wapawapai.

(Mat 26:26-29; Mak 14:22-25; Luk 22:14-20)

17 Ana vonemi da ami vikiidaburana vokavara kubiine na kamonai na berona irakata ma biibiina igisi, tuna kubiine ke ata vivigheghenimi. 18 Kunona, avi yanei da Keresiyana kudubimi koikiidaburana na kamomiyai ke kota vivinuwasago bubuna. Ma anotanotai da weni sisiyina na vonavaghata. 19 Agunai tami viya koikawapata na nani kamonai wawaya inakovi da iyavo kava na God ina wawaya maninimi. 20 Maranai koikiidaburana na Bada ina kamporagha kota kani ma kegha, kokamkam wapawapa. 21 Iyavo kava kovi nao kokamkam na turaturami ke kota notanotisi da wawaya viya vitonara ekarakarisi. Ma viya na eumuma neghanegha. 22 Kade ami numa bo kegha da kota kam ma kotuma? Keresiyana damsi viya kokitaoruwesi ma moyamoyakisi koinimayamayisi bo? Ikikava ana vonemi? Ani gheghenimi bo kegha? Kegha taweyana!

Ikikava Bada ina kamporagha ita kam bubuna.

23 Taku aviyavisina Bada gwabinai aviiya na bade tami kurimi avi damani, iyamna vaghata na weni. Muriyai da Judas ita vomiiri ma Bada Yesu iti wawanei na Yesu parawa iviiya ma 24 God kurina ivi kiikiiwa, ivogimai ma ivona bo, “Weni tuna na taku tupuwiku, tuna tami kubiimi. Weni nakanani kona beraberai da taku kona notanota nonoweku.” 25 Ma bade nakanani nani kamna murinai, redu iviiya ma ivona bo, “Weni reduna kamonai na taraku, tuna ivi matakira da God tami yavata vivaghina vuna makamakiina koberai. Maranai konumumai na taku kona notanota nonoweku.” ^e

26 Maranai weni parawina kona kanikani ma weni redunai konumuma, tuna na Bada ina rabobo matakirina. Kona beraberai da ina ku vovira marana. 27 Tuna kubiine tam iyai Bada tupuwina kuna kam wapawapai bo tarana kunuma wapawapai, tuna na berabero ghamanakina keberaberai Bada tupuwina ma tarana kurina. 28 Tuna kubiine wawaya ini tupavire meyei ma ina damini da tuna vaghina na Bada tupuwina ina kani ma redunai inuma. 29 Wawaya, Bada tupuwina iyamna ke itakova bubuni ma ina kam ma inuma wapawapai na God ini tupaviresi ma ina vona da berabero iberai. 30 Tami viya nakanani koberaberai kubiine na mitamitami ma gubagubagimi ma kamomiyai wawaya viya namada irabobo. 31 Ma mikeda tota mani titupavira meyeta na God ke ini tupavireta. 32 Ma takovi da maranai Bada God itupavirevireta ma kovogha gisina everevereta na vibeyebeyena eberaberai da ini maninita da mara damonai dobu ku berona ina tereterei na tota ke ini wavuta.

33 Tuna kubiine varevaresiku, Bada ina kamporagha kubiine kovi koyakoyagha da kudubimi koni kiidaburana ina kovi ma muriyai da kona kam patapata. 34 Ma iyi vitonara ikarai na kunona ina numiiyai ita kam, da maranai koni kiidaburana na ke ina kam ma inuma wapawapa. Ina bera beroi na mara damonai God ina vitupavira ku kamona ina rui. Ma vaghina, bera viya na karakava ani beyebeyemi maranai ana vovira kurimi.